Gipakita sa Dakbayan sa Dipolog ang lig-on nga panaghiusa ug suporta sa sektor sa Persons with Disabilities (PWD) human malampusong gihimo ang 2025 PWD General Assembly, nga Gipahigayon sa Francisca Ballroom, Top Plaza.
Gipangunahan sa City Social Welfare and Development Office (CSWDO), uban sa Dipolog City Association of Persons with Disabilities ug sa Center for Children with Special Needs, ang kalihokan nga nagtigom sa mga lider ug miyembro sa PWD aron hisgutan ang ilang mga panginahanglan ug programa.
Mitambong isip representante sa Gobernador sa Zamboanga del Norte nga si Hon. Darel Dexter T. Uy si Ms. Marilou Calibo, Executive Assistant IV, kauban si Disability Officer IV Mr. Roel R. Zorilla ug Provincial PDAO Head Mr. Rosario Daymiel.
Tumong sa asembliya ang pagpalig-on sa inklusibong mga programa, pagpauswag sa kooperasyon tali sa lokal ug probinsyal nga kagamhanan, ug pagpaminaw sa mga isyu nga giatubang sa mga PWD, isip kabahin sa padayon nga paningkamot sa gobyerno sa paghatag gahum ug kaayohan sa sektor.(IKEN B. GULLEM)
Source: Dipolog City Government