Human makab-ot sa Office of the City Prosecutor–Dipolog City ang usa ka talagsaong rekognisyon gikan sa Department of Justice, mipadayag ug pasalamat si City Prosecutor Atty. James P. Verduguez sa City Government of Dipolog tungod sa dakong papel niini sa kalampusan sa buhatan.
Sa iyang sulat, gipasalamatan ni Verduguez ang administrasyon ni Mayor Roberto Y. Uy sa padayong tabang nga nakapaayo sa operasyon sa buhatan, ilabi na sa paspas nga paghusay sa mga kaso ug taas nga conviction rate.
Matud pa, ang buhatan nakapadayon sa 98% hangtod 100% nga performance sa disposisyon sa mga kaso, hinungdan nga nahatagan kini sa “Best Performing DOJ Office Award.”
Ang maong rekognisyon pormal nga gitunol atol sa Year-End Performance Conference sa DOJ Rehiyon 9 nga gipahigayon sa Ipil, Zamboanga Sibugay, nga nagtimaan sa epektibo ug episyenteng pagpatuman sa misyon sa Department of Justice sa siyudad.(IKEN B. GULLEM)
Source: Dipolog City Government