Human sa kapin 20 ka tuig nga paghulat, pormal nang nabaton sa Dakbayan sa Dapitan ang mga titulo sa yuta sa City Government Complex (New City Hall) ug Dapitan City Fish Port sa Barangay Bagting niadtong Hunyo 29, 2026.
Personal nga gidawat ni Mayor Evelyn “Belen” Uy ang mga dokumento nga gitunol sa Provincial Environment and Natural Resources Office (PENRO) ubos sa pagpangulo ni Jaime Salvador, uban sa mga opisyal sa Technical Services Division, Regulations and Permitting Section, ug mga representante sa Community Environment and Natural Resources Office (CENRO)-Polanco.
Lakip sa gitunol ang Special Patent sa duha ka mga propiedad, nga nagtapos sa dugay nang isyu sa legal nga pagpanag-iya sukad pa sa paggamit sa dakbayan niini kapin duha ka dekada na ang milabay.
Sumala sa city government, gipasiugda ni Mayor Uy ang pagproseso sa mga titulo sa dihang milingkod siya isip mayor niadtong Hulyo 2025, aron maseguro ang legal nga pagpanag-iya sa mga kabtangan sa gobyerno ug mapadali ang umaabot nga mga proyekto sa imprastraktura ug serbisyo publiko.
Mipasalig usab ang PENRO sa padayon nga suporta sa mga inisyatibo sa dakbayan alang sa pagpatitulo sa ubang mga government properties.
Samtang, bag-o lang usab nakabaton ang City Government sa titulo sa yutang pagatukoran sa bag-ong Public Market sa Barangay Linabo, nga nagpalig-on sa paningkamot sa administrasyon sa pagsiguro sa legal nga pagpanag-iya sa mga pampublikong kabtangan alang sa dugayng kalamboan sa Dakbayan sa Dapitan.(IKEN B. GULLEM)
Source: Dapitan City Government