Gipaambit sa City Environment and Natural Resources Office (CENRO) ang kahibalo bahin sa kinaiyahan ngadto sa mga kabataan pinaagi sa usa ka educational tour sa Cogon Eco-Tourism Park niadtong Septiyembre 2, 2026.
Miapil sa maong kalihokan ang mga estudyante gikan Grade 1 hangtod Grade 10 sa Dipolog Community School, Inc., diin ilang nasuta ang kahinungdanon sa parke isip usa sa mga “lungs” o baga sa siyudad nga makatabang sa pagmintinar sa mas himsog nga palibot.
Atol sa educational tour, gitudloan ang mga estudyante bahin sa biodiversity sa lugar ug sa nagkalain-laing klase sa flora ug fauna nga makita sulod sa parke.
Pinaagi sa aktuwal nga pag-obserbar ug hands-on nga pagkat-on diha mismo sa kinaiyahan, mas nasabtan sa mga estudyante nga ang pagpanalipod sa kalikupan dili lamang responsibilidad sa mga environmental office, kondili apil ang matag miyembro sa komunidad.
Gipasiugda usab sa kalihokan ang importansya sa paghatag og environmental education sa kabataan samtang sayo pa, aron mapalambo ang ilang appreciation sa natural resources ug mapukaw ang ilang pagbati sa responsibilidad sa pag-atiman niini.
Ang maong educational tour nahimong oportunidad alang sa mga estudyante nga makakat-on gawas sa classroom ug makasinati mismo sa kinaiyahan, diin ilang nakita ang papel sa mga green spaces sa pagpreserba sa biodiversity ug pagpalambo sa kalidad sa kinabuhi sa komunidad.
Pinaagi sa padayon nga environmental education ug community engagement, gipalig-on ang paningkamot sa paghimo og usa ka henerasyon sa mga kabataan nga mas nahibalo, responsable, ug andam nga moapil sa pagpanalipod sa kalikupan.(IKEN B. GULLEM)
Source: Dipolog ENRO