Gipaninguhaan sa Philippine Coconut Authority (PCA) ug mga partner nga ahensiya nga mas mapadali ug mapalambo ang paghatod sa mga programa ug serbisyo ngadto sa mga coconut farmer sa Zamboanga Peninsula pinaagi sa mas hugot nga inter-agency coordination.
Gipahigayon niadtong Septiyembre 3, 2026, sa Mibang Hotel sa Dipolog City ang 3rd Quarter Regional Inter-Agency Technical Committee (RIATC) Meeting alang sa Coconut Farmers and Industry Development Plan (CFIDP), diin gi-review ang implementasyon sa mga programa ug giila ang mga lakang nga gikinahanglan aron matubag ang mga kal-ang ug problema sa programa.
Sa maong meeting, matag implementing agency mipresentar sa ilang mga accomplishment, maayong praktis, mga isyu ug concerns, ug mga umaabot nga kalihokan ubos sa CFIDP.
Gituki usab ang mga update gikan sa CFIDP Project Management Office (PMO), mga report sa resource persons ug coconut farmer representatives, ug ang performance sa mga ahensiya sa FY 2025, lakip ang ilang mga target alang sa FY 2026.
Usa sa mga importanteng concern nga gihatagan og pagtagad mao ang dugang nga funding requirements sa Department of Public Works and Highways (DPWH) alang sa pagkompleto sa mga Shared Processing Facilities.
Mitambong sa kalihokan sila Rick Dalid, Technical Development Coordinator alang sa CFIDP; Edzhel Kaye Cabaljog, Regional CFIDP Coordinator; DC Raymunda Biolango sa DTI-Zamboanga del Norte; ug Dr. Aldrin Darilag sa PCA CFIDP Project Management Office, uban sa mga representante sa nagkalain-laing implementing agencies ug coconut farmer stakeholders.
Pinaagi sa paghisgot sa accomplishments ug implementation concerns sa usa ka lamesa, gitumong sa RIATC meeting nga masiguro nga ang mga kalihokan sa nagkalain-laing ahensiya magkahiusa ug motubag sa aktuwal nga panginahanglan sa mga mag-uuma.
Padayon ang PCA ug mga partner agencies sa pag-coordinate sa mga programa ubos sa CFIDP aron mapalambo ang industriya sa lubi ug mapalapad ang mga oportunidad alang sa mga coconut farmer sa Zamboanga Peninsula.(IKEN B. GULLEM)
Source: DTI R9