Dili lamang seguridad sa komunidad ang giatiman sa kapulisan kundili apil usab ang kaayohan sa kabataan human mibisita ang kapulisan sa Zamboanga del Norte 2nd Provincial Mobile Force Company ngadto sa Delucot Elementary School aron magpahigayon og child protection awareness para sa mga estudyante.
Gihimo kining school visitation sa Barangay Delucot sa Godod ubos sa pangulo ni Edwin D. Verzon, Force Commander sa yunit, diin nakig-interact ang mga pulis sa mga Grade 5 nga estudyante, ug mihimo diskusyon sa simple ug masabtan nga paagi aron masabtan sa mga bata ang ilang mga katungod ug unsaon pagpanalipod sa ilang kaugalingon.
Gihatagan usab og educational flyers ang mga bata nga naghisgot sa mahitungod sa child protection ug mga isyu nga kasagaran maatubang sa kabataan sama sa pang-abuso, bullying, kalapasan sa kabataan ug exploitation.
Gawas sa child protection awareness, nagpahigayon usab ang team og information drive batok sa recruitment sa mga rebeldeng grupo, ilabi na sa mga ginatawag nga CTG o communist terrorist groups. Gipahinumduman ang mga estudyante nga mag-amping sa mga tawo o grupo nga mahimong mosulay sa pag-impluwensya kanila pinaagi sa sayop nga ideolohiya.
Gilauman sa kapulisan nga pinaagi sa mga school visitation sama niini, mas maalamon ug mas alerto ang mga kabataan batok sa mga hulga sa ilang seguridad ug kaugmaon.(IKEN B. GULLEM)
Source: Zamboanga del Norte 2nd PMFC