Nadakpan sa kapulisan sa Cebu City Police Office (CCPO) ang usa ka giila nga High-Value Individual (HVI) sa usa ka buy-bust operation nga gihimo sa Abellana Police Station 2 alas 9:30 sa gabii sa Marso 13, 2026 sa Sitio San Roque, Barangay Sambag 1, Cebu City.
Ang nadakpan giila sa alyas “Jay,” 23 anyos ug residente sa maong lugar. Siya gipasanginlan sa paglapas sa Sections 5 ug 11 sa Republic Act No. 9165, nga may kalabutan sa pagbaligya ug pagpanag-iya og ilegal nga drogas. Ang operasyon gipahigayon sa SDEU/Tracker Team sa Abellana Police ubos sa liderato ni Charlie Jay L. Ancheta, ug adunay koordinasyon sa Philippine Drug Enforcement Agency (PDEA).
Sa imbestigasyon sa CCPO, nasayran nga dugay na nalambigit ang suspek sa pagbaligya og ilegal nga drogas bisan pa sa wala pa ang Sinulog Festival 2026.
Gituohang nagbaligya siya og ginadudahang shabu nga mokabat gikan 5 gramos hangtod 25 gramos o labaw pa, ug nag-operate sa Barangay Sambag 1 ug ubang silingang lugar. Gibanabana nga mokabat sa 200 gramos matag bulan ang iyang ginapakatap nga drogas.
Narekober sa operasyon ang 11 ka heat-sealed nga plastik sachet nga adunay ginadudahang shabu, buy-bust money nga ₱14,500, ug uban pang drug paraphernalia. Ang tanan nga nakuha nga drogas adunay gibana-banang timbang nga 160 gramos ug balor nga mga ₱1,088,000 base sa standard drug price.
Gihimo ang inventory sa mga ebidensya uban sa presensya sa representante gikan sa media, Department of Justice, ug usa ka opisyal sa barangay aron masiguro nga nasunod ang hustong proseso sa balaod.
Ang mga ebidensya gidala sa Cebu City Forensic Unit 7 alang sa laboratory examination samtang ang suspek nagpabiling gitanggong sa Police Station 2 samtang giandam ang kaso nga ipasaka sa korte.
Source: CCPO
I via Renante Socia Lada