Nakalikom og 472 ka bag sa dugo ang 902nd (ZDN) Ready Reserve Infantry Battalion sa Philippine Army atol sa usa ka blood donation drive isip kabahin sa dungan nga blood donation program sa Reserve Command, Philippine Army alang sa ika-129 nga Founding Anniversary sa Philippine Army, nga gipahigayon sa lain-laing bahin sa nasod.
Gipangunahan ni MAJ Darel Dexter T. Uy, commanding officer sa 902nd RRIBn, ang kalihokan uban sa 902nd Community Defense Center ug sa 9th Regional Community Defense Group sa RESCOM. Gitambongan usab kini sa mga reservists, ROTC cadets, mga estudyante, ug mga partner stakeholders gikan sa akademikong institusyon ug lokal nga panggamhanan sa probinsya.
Gihimo ang maong kalihokan sa DMC College Foundation, Inc. sa Dipolog City, Jose Rizal Memorial State University sa Dapitan City, ug Saint Joseph College of Sindangan, Inc., sugod alas 7:00 sa buntag hangtod alas 4:00 sa hapon nga gitambongan sa kapin 500 ka partisipante, lakip na ang 431 ka ROTC cadets.
Sumala sa mga organizers, nakolekta sa maong kalihokan ang 472 ka blood bags nga mokabat sa 212,400 cc nga dugo. Ang mga donasyon ipagamit nga libre alang sa mga pasyente nga nanginahanglan ug makatabang sa pagsuporta sa mga ospital ug medical facilities sa tibuok Zamboanga del Norte.(IKEN B. GULLEM)
Source: Zamboanga del Norte Provincial News Network