Gipunting sa kabatan-onan ang papel sa pagpanalipod sa kadagatan ug kalikupan atol sa usa ka Information, Education, and Communication (IEC) campaign nga gipahigayon bag-ohay lang sa Amando B. Amatong Civic Center.
Ang kalihukan mao ang panapusang kalihokan sa Kadagatan Ampingan, Plastik Likayan campaign ubos sa Marine Environment Protector Program sa PEMSEA, nga gilusad sa Andres Bonifacio College kauban ang City Environment and Natural Resources Office (CENRO). Gitambongan kini sa mga estudyante gikan sa lain-laing public ug private schools sa siyudad.
Sa programa, naghatag ug inspirasyonal nga mensahe si EMB IX Regional Director Atty. Abbas I. Lao, samtang gihisgutan ni Ms. Karen C. Tandang, Chief sa EMB IX Solid Waste Management Division, ang kahinungdanon sa Ecological Solid Waste Management Act o RA 9003 sa malungtarong pagdumala sa basura.
Sa hapon, gipakita sa mga estudyante ang ilang kahanas ug adbokasiya pinaagi sa TikTok Video Contest ug Poster Making Contest nga nagpunting sa kampanya batok sa plastic pollution. Gipahigayon usab ang usa ka workshop aron tipunon ang mga ideya sa kabatan-onan kabahin sa epektibong pagminus ug pagdumala sa basura, nga naghatag kanila ug aktibong papel sa pagporma sa lokal nga solusyon alang sa kalikupan.(IKEN B. GULLEM)
Source: Dipolog ENRO