Gisusi sa Dipolog City Water District (DCWD) ang posibleng panagtambayayong sa City Government of Dipolog human magpahigayon ug courtesy visit ang delegasyon sa ahensya kang City Mayor Roberto Y. Uy.
Gipangulohan ang delegasyon ni DCWD General Manager Engr. Ruel Tabada, kauban ang mga miyembro sa Board of Directors ug ang Legal Officer, aron hisgutan ang mga plano sa pagpalambo ug pagpaayo sa serbisyo sa tubig sa siyudad.
Tumong sa panag-istoryahanay ang pagpalig-on sa kooperasyon tali sa DCWD ug City Government aron mapaayo ang delivery sa serbisyo sa tubig, masulbad ang mga isyu kabahin sa suplay, ug masuportahan ang malungtarong kalamboan alang sa nagkadaghang panginahanglan sa mga Dipolognon.
Mitambong usab sa miting si City Planning and Development Coordinator Engr. Albert S. Alimpulos ug City Legal Officer Atty. Goldie Love P. Gonzales, isip suporta sa padayon nga koordinasyon ug mga inisyatiba sa kalamboan.(IKEN B. GULLEM)
Source: Dipolog City Government