Aron masubay ang kahimtangan sa mga proyekto sa Tinuigiban Farmers Agrarian Reform Cooperative sa lungsod sa Leon B. Postigo, ang Department of Agrarian Reform Zamboanga del Norte personal nga miduaw sa kooperatiba.
Tumong sa field visit ang pag-evaluate sa mga livelihood ug enterprise projects nga gisuportahan sa DAR, ug gisusi sa grupo ang progreso sa mga kalihokan, samtang giila usab ang mga babag nga nakaapekto sa adlaw-adlaw nga operasyon sa kooperatiba.
Atol sa ilang pagdulog, ang pagbisita gipangulohan ni Provincial Agrarian Reform Program Officer II Daisy Dell Suan Digamon uban ni PARPO I Engr. Alfonso A. Tan, nga maoy nakigpulong sa mga opisyal ug miyembro sa organisasyon aron maminaw sa ilang mga kasinatian, panginahanglan, ug mga suhestiyon.
Kini nga dayalogo usa ka lakang aron mapalig-on ang kapasidad sa kooperatiba ug masiguro nga magpadayon ang mga proyekto sa dugayng panahon. Matud pa sa DAR, ang maong pagbisita kabahin sa padayon nga pakig-uban sa mga komunidad sa agrarian reform aron masiguro nga ang suporta sa gobyerno maghatag og tinuod ug malungtarong kauswagan sa mga mag-uuma.(IKEN B. GULLEM)
Source: DAR Zambonorte