GUTALAC — Magpatuman og libre nga Mental Health Consultation ang lokal nga panggamhanan karong Pebrero 23, 2026, sa Salvador Gutalac Covered Court sugod alas 9:00 sa buntag hangtod alas 3:00 sa hapon.
Gina-awhag ang mga residente, ilabi na kadtong nag-antos og kalisod sa pagtulog tungod sa daghang hunahuna, pirming kakulba o kaguol, kahadlok, kalagot, pagbag-o sa batasan ug pagkaon, paglikay sa pamilya, o kalibog sa gibating emosyon, nga mopahimulos sa maong serbisyo. Lakip usab sa atimanon ang mga nakasinati og mas lawom nga mental ug emosyonal nga kahimtang nga nanginahanglan og propesyonal nga konsultasyon.
Tumong sa inisyatiba nga mapalapad ang kahibalo sa komunidad bahin sa kahimsog sa panghunahuna ug mahatagan og angay nga giya ang mga nanginahanglan og tabang. Ang serbisyo bukas sa publiko ug walay bayad, ug alang sa dugang pangutana, mahimong mobisita sa Rural Health Unit Gutalac.(JENIFFER JR. DELICA)
Source: LGU Gutalac- Public Information