Nanawagan ang Office of the City Mayor sa Dapitan sa tanang interesadong sektor nga motambong sa Public Consultation kabahin sa gisugyot nga Rizal Monument nga ipatukod sa Dapitan Lawaan Rotunda.
Sumala sa pahibalo, tumong sa maong konsultasyon nga masiguro nga ang monumento magpahayag sa tinuod nga kahulugan sa pagpuyo ni Jose Rizal sa Dapitan ug magrepresentar sa kultura ug identidad sa siyudad.
Giimbitar usab sa kalihokan si Prof. Jose Manuel Sicat sa University of the Philippines College of Fine Arts, kinsa mopresentar sa inisyal nga disenyo sa monumento alang sa diskusyon ug mga sugyot gikan sa publiko.
Giawhag ang partisipasyon sa mga lokal nga historyador, Rizal scholars ug mga tigdukiduki, akademiko ug magtutudlo, mga manlalaban sa kabilin, ug mga Dapitanon nga adunay dakong pagtagad sa kasaysayan sa siyudad.
Samtang, pagahimoon ang Public Consultation karong Pebrero 21, 2026, Sabado, ala 1:00 sa hapon sa Amphitheatre, ikaduhang andana sa Dapitan Government Center.(IKEN B. GULLEM)
Source: City Government of Dapitan