Kalamboan sa turismo sa syudad sa Dipolog ug sa tibuok lalawigan sa Zamboanga del Norte ang nag-unang tumong sa pagbisita ni Tourism Infrastructure and Enterprise Zone Authority (TIEZA), Chief Operating Officer Mark Lapid, kinsa personal nga mipahigayon ug inspeksyun sa nagkalain-laing imprastraktura sa syudad, ug mismong giabi-abi ni Gov. Darel Uy, kaniadtong Abril 23.
Lakip sa gisusi ni COO Lapid ang implementasyon sa usa ka tourism center nga itukod duol sa boulevard ug breakwater, nga i-konekta sa River Park isip kabahin sa mas dako nga plano sa urban tourism development. Gi-conceptualize usab nga magbutang og dancing fountain nga adunay night show aron mahimong dugang atraksyon ilabi na sa mga lokal nga mamasyal sa kagabhion.
Gibutyag usab niini nga adunay gigahing pondo nga mokabat sa ₱100 milyon alang sa tourism center ug laing ₱100 milyon para sa breakwater walkway extension. Kini nga mga proyekto gilauman nga makahatag og bag-ong dagway sa waterfront area sa siyudad ug mosuporta sa MICE o ang Meetings, Incentives, Conferences, and Exhibitions activities isip usa sa mga pwersa nga makaduso sa turismo sa Dipolog.
Gihisgutan usab ang mas lapad nga plano alang sa expansion sa airport aron mahimo kining international, nga magbukas og daghang oportunidad sa turismo ug negosyo. Lakip sa gihisgutan ang konektibidad pinaagi sa expressway padulong sa Zamboanga, nga makapamubo sa biyahe ngadto sa mga tulo ka oras diin usa ka dakong tabang sa transportasyon ug ekonomiya.
Bisan pa niini, gipasabot nga ang maong mga proyekto kinahanglan pa ipresentar sa national government tungod sa kadako sa pondo ug sakop sa plano. Si Lapid mipahayag nga andam ang TIEZA sa pagtabang sa pagpondo sa feasibility study (FS) ug paghatag og teknikal nga asistensya aron mapadali ang implementasyon.
Gilauman nga ang maong mga inisyatibo makabenepisyo usab sa mga micro, small, and medium enterprises (MSMEs), nga makahatag og daghang trabaho ug panginabuhian sa mga residente.
Sa kinatibuk-an, ang pagbisita ni Lapid nagpasabot sa mas lig-on nga paningkamot sa gobyerno aron mapalambo ang turismo sa Dipolog ug sa tibuok rehiyon sa Zamboanga Peninsula, uban sa pagtutok sa MICE development isip usa sa mga yawe nga estratehiya sa pagpauswag sa lokal nga ekonomiya.
News and photo by: IKEN GULLEM