Bag-ong kahigayonan sa mas independenteng paglihok ang nadawat sa duha ka benepisyaryo human sila hatagan og wheelchair pinaagi sa panagtinabangay sa Tagum Multi-Purpose Cooperative ug Probinsyal nga Pangagamhanan sa Zamboanga del Norte niadtong Abril 23, 2026.
Gipasiugdahan ang donasyon isip kabahin sa social welfare program sa probinsya nga nagtumong sa diretsong pagtabang sa mga indibidwal nga adunay seryosong kahimtang sa panglawas, ilabina sa ilang pang adlaw-adlaw nga panginahanglan sa paglihok.
Personal nga gitunol sa mga opisyal sa probinsya, lakip si Acting Provincial Administrator Charmie Asprer-Yu ug Acting PSWDO Officer Hannah Lou G. Mandantes, ang mga wheelchair ngadto kang Benjamin E. Randez, 71 anyos nga nakaagi og stroke, ug kang Princes Leah B. Maglangit, 16 anyos nga adunay espesyal nga kondisyon.
Kini nga tabang dili lamang kagamitan kondili usa ka paagi aron mapauswag ang kalidad sa kinabuhi sa mga benepisyaryo ug mapagaan ang responsibilidad sa ilang mga pamilya sa pag-atiman.
Gipasabot usab sa mga opisyal nga ang kolaborasyon tali sa kooperatiba ug gobyerno maoy nagpalig-on sa paghatag og serbisyo ngadto sa komunidad, ilabina sa sektor nga nanginahanglan og dugang nga pagtagad.(IKEN GULLEM)
Source: Zamboanga del Norte Provincial News Network