Malampusong gilunsad sa Technology Transfer and Entrepreneurship Collaboration and Harmonization of Growing Regional Opportunities on Wealth Creation (TECHGROW) program sa Department of Science and Technology ang advocacy initiatives niini sa Dipolog ug Dapitan City aron dasigon ang mga local researchers sa technology commercialization.
Gipangulohan ni Assistant Regional Director for Technical Operations Services Ricardo J. Apolinario III ang serye sa engagements nga nagtutok sa technology transfer ug entrepreneurship alang sa mga unibersidad ug research institutions sa probinsya.
Lakip sa gipahigayon nga aktibidad ang seminar sa Jose Rizal Memorial State University kabahin sa Technology Transfer Process sa Pilipinas ug DOST Technology Transfer Protocol.
Aktibong miapil ang faculty researchers ug mga estudyante nga nakakat-on sa proseso sa pag-convert sa research outputs ngadto sa teknolohiyang mahimong produkto ug serbisyo sa merkado.
Mipadayag usab ang TECHGROW team sa Saint Vincent’s College Inc. atol sa Basic Research Ethics Training diin ilang gipasiugda ang commercialization isip paagi sa pagmugna og lokal nga teknolohiya ug oportunidad sa ekonomiya sa rehiyon.
Sumala sa DOST, ang TECHGROW program nagtumong sa pagtabang sa mga research institutions ug higher education institutions aron mapuslan sa komunidad ug industriya ang mga research nga gipondohan sa gobyerno.(IKEN B. GULLEM)
Source: DOST Regional Office No. IX