Kinatibuk-ang 348 ka batang lalaki ang malampusong natuli atol sa duha ka adlaw nga Operation Tuli 2026 nga gipahigayon sa Rural Health Unit (RHU) sa Roxas.
Tumong sa maong programa nga mahatagan og libre ug luwas nga serbisyo medikal ang mga kabataan aron mapalambo ang personal hygiene ug malikayan ang posibleng impeksyon.
Gipasiugda sa RHU-Roxas nga ang maong kalihokan kabahin sa paningkamot sa lokal nga panggamhanan sa pagpalig-on sa panglawas ug kaayohan sa mga kabatan-onan sa lungsod.
Gipasalamatan usab sa RHU ang suporta sa LGU-Roxas ubos sa liderato ni Mayor Ismael Jr. Rengquijo, Vice Mayor Rolando “Jun-jun” Yebes, mga konsehal, barangay officials, ug barangay health workers nga mitabang sa maong kalihokan.
Samtang, gipasidunggan ang mga medical personnel nga gipangulohan nila Dr. Christian Atienza, Dr. Roselynne Respondo, ug Dr. Gayle Rose Legara uban sa mga nurses, midwives, ug RHU staff nga nagserbisyo atol sa operasyon.
Sumala sa RHU-Roxas, padayon nilang ipahigayon ang mga programang medikal aron mas mapalapdan ang serbisyo panglawas alang sa komunidad.(IKEN B. GULLEM)
Source: RHU Roxas