Nagpadayon ang Provincial Government of Zamboanga del Norte sa pag-ayo ug pagpalapad sa mga provincial roads sa nagkalain-laing lungsod sa probinsya pinaagi sa mga proyekto sa Provincial Engineering Office (PEO).
Lakip sa gihimong proyekto ang clearing sa road shoulders sa Putongan-Libay Provincial Road nga mokabat og siyam ka kilometro aron mas masayon ug luwas ang pag-agi sa mga sakyanan.
Gipaayo usab ang 35-metros nga naguba nga bahin sa El Paraiso–New Argao–Mercedes–San Jose Provincial Road sa bahin sa Mercedes, samtang gipadayon ang road widening nga mokabat og 1,300 metros aron mapalambo ang accessibility ug trapiko sa maong dalan.
Sa lungsod sa Labason, gipadayon usab ang resurfacing ug road graveling sa La Union-Gabu Provincial Road nga adunay gitas-on nga 500 metros.
Sumala sa PEO, ang mga proyekto gihimo isip tubag sa mga hangyo sa mga local officials ug residente nga nagkinahanglan og mas maayong kahimtang sa dalan sa ilang lugar.
Ubos sa administrasyon ni Governor Darel Dexter Uy, padayon nga giprayoridad sa provincial government ang road maintenance ug rehabilitation aron mapalambo ang transportasyon ug koneksyon sa mga komunidad sa Zamboanga del Norte.(IKEN B. GULLEM)
Source: Zamboanga del Norte Provincial News Network