Kusog ug garbo nga misulod ang delegasyon sa Zamboanga Peninsula Athletic Association (ZPRAA) atol sa opening ceremony sa ika-66 nga Palarong Pambansa niadtong Mayo 24, diin opisyal nga gisugdan sa Region IX ang ilang kampanya batok sa labing kusgan nga mga atleta sa nasod.
Naglangkob sa 812 ka atleta, coaches ug opisyales nga gipangulohan ni DepEd IX Regional Director Dr. Ronelo Al Firmo, nagmartsa ang Team Zampen uban ang taas nga determinasyon ug paglaum nga mapataas ang bandera sa Zamboanga Peninsula sa nasudnong kompetisyon.
Gipahigayon ang grand opening sa Datu Lipus Makapandong Governor D.O. Plaza Sports Complex ubos sa temang “Unlocking the Future Through Sports,” nga naghatag gibug-aton sa gahum sa sports isip dalan sa paghulma sa disiplina, liderato ug kaugmaon sa kabatan-onan.
Kapin 11,000 ka atleta gikan sa 20 ka athletic associations sa tibuok Pilipinas ang nagtigi sa 25 ka sporting events karong tuiga, hinungdan nga mas mosiga ang kompetisyon sa Palarong Pambansa 2026. Alang sa Region IX, dili lamang kini pakigsangka alang sa medalya kondili usa usab ka higayon sa pagpakita sa talento, kusog ug espiritu sa mga kabatan-ong Zamboangueño sa nasudnong entablado.
Uban sa suporta sa tibuok rehiyon, nagpadayon ang paglaum nga ang Zamboanga Peninsula Sharks makahimo og dakong marka ug makadala og dungog alang sa Region IX.(IKEN B. GULLEM)
Source: HAPIsabela ZPRAA 2026