Nadakpan ang kapin 655 ka mga violator atol sa gipahigayon nga dinungan nga operasyon sa Cebu Police Provincial Office kagahapon Mayo 24, 2026 isip kabahin sa ilang padayon nga kampanya batok sa kriminalidad ilawom sa “Safer Cities Initiative.”
Sumala sa Cebu PPO, nakapahigayon sila og 246 ka operasyon batok sa nagkalain-laing paglapas sa lokal nga ordinansa sama sa pag-inom og pagpanigarilyo sa pampublikong lugar, paglakaw nga hubo sa imabaw nga bahin sa lawas sa dalan, paglapas sa curfew sa mga menor de edad, ilegal nga videoke operation, ug mga kalapasan sa trapiko. Kini nga kampanya gisunod subay sa mando ni DILG Sec. Juanito Victor Remulla aron mapalig-on ang kalinaw ug kaluwasan sa komunidad pinaagi sa higpit nga pagpatuman sa balaod ug mas lig-on nga police visibility.
Sa report sa kapulisan, 378 ka tawo ang nadakpan tungod sa paglapas sa traffic ordinances sa mga siyudad ug lungsod. Aduna usab 118 ka tawo nga nasita tungod sa pag-inom sa pampublikong lugar, samtang 109 ka menor de edad ang nakalapas sa curfew ordinance.
Dugang pa, 27 ka tawo ang nasakpan nga naglatagaw nga walay sapot sa taas nga lawas ug 22 usab ang nadakpan tungod sa pagpanigarilyo sa mga lugar nga gidili. Mokabat sa ₱163,750 ang nakolektang multa atol sa operasyon.
Matud pa ni PCOL Abubakar Udang Mangelen Jr., dako ang natabang sa padayon nga pagpatuman sa mga ordinansa aron mapadayon ang kalinaw ug kahapsay sa komunidad. Iyang giingon nga pinaagi sa disiplina ug pagtuman sa balaod, maminusan ang posibilidad sa mga krimen ug mas mahimong luwas ang mga residente.
Gidayeg usab ni PBGEN. Arnold Evangelista Abad ang Cebu PPO tungod sa ilang aktibong kampanya batok sa kriminalidad. Matud niya, ang estriktong pagpatuman sa ordinansa ug presensya sa kapulisan makatabang sa pagpugong sa dagkong krimen ug makapalig-on sa pagsalig sa publiko ngadto sa mga otoridad.
Samtang gipadayag ni Gob. Pamela Baricuatro ang bug-os nga suporta sa probinsyal nga gobyerno sa maong programa. Giingon niya nga importante ang kooperasyon sa kapulisan, lokal nga panggamhanan ug katawhan aron mapadayon ang malinawon ug luwas nga komunidad alang sa tanang Sugboanon.
I via Renante Socia Lada