Sa nakalabay nga gabii, nakahimo og operasyon ang Special Operation Team sa CIDG Regional Field Unit 7 uban ang CIDG Mandaue City ug lokal nga kapulisan sa Barangay Tipolo, Mandaue City, Cebu.
Sa maong operasyon, nadakpan ang duha ka lalaki nga suspetsado ug nasakmit ang 40 ka master cases sa sigarilyo nga kantidad mga ₱900,000. Kini nga mga sigarilyo wala “Graphic Health Warnings” nga gi-required sa balaod.
Ang mga suspetsado giila lang sa mga pangalang “Isko” ug “Virgil,” ug sila nadakpan samtang nagbaligya ug nag apod-apod sa maong mga sigarilyo.
Sumala sa CIDG, ang balaod nga Republic Act No. 10643 nagmando nga ang tanan sigarilyo kinahanglan adunay klaro nga hulagway ug pasidaan bahin sa peligro sa panigarilyo.
Kini aron maprotektahan ang kahimsog sa mga tawo ug mapugngan ang paggamit sa substandard nga tobacco products.
Gipasalamatan sa CIDG ang ilang mga personnel sa Mandaue ug Regional Field Unit 7 tungod sa malampuson nga operasyon. Giingon usab nila nga magpadayon ang ilang kampanya batok sa ilegal nga kalihokan sa tibuok nasud.
Gipahimangnoan sa CIDG ang publiko nga dili mopalit og sigarilyo nga walay “graphic health warning” ug i-report dayon ang bisan unsang ilegal nga baligya sa tobacco products.
I via Renante Socia Lada