Opisyal nang natapos niadtong Hulyo 5 ang implementasyon sa Tax Amnesty Program ubos sa Republic Act No. 12001 o Real Property Valuation and Assessment Reform Act (RPVARA), nga nagtugot sa pagtangtang sa penalties, surcharges, ug interests sa mga delingkwenteng real property taxes nga natala hangtod Hulyo 5, 2024.
Atol sa implementasyon sa programa, giawhag sa Office of the Provincial Treasurer (OPT) ang tanang tag-iya sa mga yutang agrikultural, residensyal, komersyal, industriyal, ingon man sa mga tag-iya sa makinarya, balay, ug building sa tibuok probinsya nga pahimuslan ang maong oportunidad aron mahipos ang ilang mga obligasyon sa buhis.
Gipasiugda ni Provincial Treasurer Betty B. Oriola, CPA, ang kahinungdanon sa maong programa isip lakang sa paghatag og kahigayonan sa mga magbubuhis nga makabayad sa ilang real property taxes nga walay dugang nga penalties ug interests, samtang nagpalig-on usab sa paningkamot sa probinsya sa responsableng koleksiyon sa lokal nga kita.
Kini nga Tax Amnesty Program nahimong usa sa mga inisyatiba nga nagtumong sa paghatag og kahupayan sa mga magbubuhis ug sa pagdasig sa mas taas nga pagsunod sa mga obligasyon sa pagbayad sa buhis sa probinsya.(IKEN B. GULLEM)
Source: Zamboanga del Norte Provincial News Network