Nagpadayon ang Task Force Alambre, pinangulohan sa Office of the Building Official (OBO), sa ilang cable clearing operation nga gipahigayon daplin sa karsada duol sa Green Mellow Court, Barangay Estaka, Dipolog City, kaniadtong Oktubre 24,2025.
Ang operasyon gipahigayon pinaagi sa panaghiusa sa Zamboanga del Norte Electric Cooperative (ZANECO), Philippine Long Distance Telephone (PLDT), Orient Cable, Cruztelco, ug National Telecommunications Commission (NTC). Nagkahiusa silang tanan sa pagpanghipos ug pagtangtang sa nagbitay, mga daan, ug delikadong mga kable nga naghulga sa seguridad sa publiko.
Tuyo sa kalihokan ang pagpanghupay sa peligro, pagpasiguro sa kahapsay sa kalsada, ug paghatag sa mas limpyo ug organisadong panan-aw sa kadalanan sa siyudad.
Ang Task Force Alambre magpadayon sa maong inisyatiba aron mapaayo pa ang seguridad ug estetikang lugar sa Dipolog City.(Iken B. Gullem)