Nagpadayon sa cable clearing operation ang Task Force Alambre sa Dipolog City karong Biyernes, Marso 6, ubos sa pagpanguna sa Office of the Building Official sa paglimpyo sa nagbitay ug wala na magamit nga mga kable sa General Luna Street ug Andres Dacua Road sa Barangay Sta. Filomena.
Kabahin kini sa padayon nga inisyatibo sa city government aron wagtangon ang nagbitay nga mga kable nga mahimong hinungdan sa peligro sa dalan ug kalit nga aksidente sa mga motorista ug pedestrian.
Gitinguha usab sa maong operasyon nga mapahapsay ang kahimtangan sa mga poste ug linya sa kuryente ug telekomunikasyon aron mahimong mas organisado ang tan-awon sa dakbayan.
Padayon nga nag-awhag ang lokal nga panggamhanan sa kooperasyon sa mga utility companies ug komunidad aron masiguro ang kaluwasan ug kahapsay sa mga kalsada sa syudad.(JENIFFER JR. DELICA)
Source: Dipolog City Government