Gipalig-on pag-usab ang panag-uban sa Trisome Dipolog ug SAGA Motors Corporation human opisyal nga gipirmahan ang Memorandum of Agreement alang sa pag-organisa sa Dipolog Marathon 2026, diin magsilbi ang SAGA Motors isip Official Co-Presenter sa kalihokan.
Gipahigayon ang pagpirma sa kasabutan niadtong Marso 5 didto sa opisina sa SAGA Motors sa Dipolog City, nga gitambongan sa mga representante sa lokal nga panggamhanan, sa Trisome Dipolog nga gipangulohan ni Harrison T. Young, ug ni Maria Katrina Francesca H. Roleda, Chairman ug President sa SAGA Motors Corporation.
Ang maong panag-uban nagtumong sa padayon nga pagpalig-on sa organisasyon sa mga dagkong running event sa syudad ug sa paghatag og de-kalidad nga kompetisyon alang sa mga atleta ug runners sa rehiyon.
Gilauman usab nga ang kalihokan makapalambo sa kahimsog sa komunidad, makadani og bisita, ug makapasiugda sa turismo ug garbo sa rehiyon pinaagi sa mga world-class nga lumba nga ginahimo sa Dipolog.(JENIFFER JR. DELICA)
Source: Dipolog Marathon 2026