Gipalig-on sa Bureau of Fire Protection sa lungsod sa Liloy, Zamboanga del Norte ang suporta sa edukasyon pinaagi sa pagpatuman sa “Adopt-A-Scholar Initiative,” usa ka programa nga nagtumong sa pagtabang sa mga estudyanteng nanginahanglan og pinansyal nga suporta sa ilang pag-eskwela.
Ubos sa direktiba ni Acting Municipal Fire Marshal Dave C. Dela Cruz, boluntaryong naghatag og tabang ang mga personnel sa Liloy Municipal Fire Station ngadto sa napiling scholar sa kalihokan nga gipahigayon niadtong Marso 6 sa ilang estasyon.
Ang maong inisyatiba nagpakita sa pasalig sa BFP dili lamang sa pagpanalipod sa kinabuhi ug kabtangan batok sa sunog, kondili usab sa pagtabang sa kabatan-onan aron makapadayon sa ilang edukasyon.
Pinaagi sa programa, gilauman nga masuportahan ang pangandoy sa mga batan-ong estudyante ug matabangan silang mahimong responsableng ug produktibong miyembro sa katilingban sa umaabot.(JENIFFER JR. DELICA)
Source: BFP R9 Liloy Fire Station