Gihatagan ug bag-ong paglaum ang mga mag-uuma sa Tampilisan, Zamboanga del Norte human pormal nga gipirmahan ug gipatunhay sa Department of Agrarian Reform (DAR) ang Memorandum of Agreement (MOA) ug turnover sa livelihood project ngadto sa Tampilisan United Farmers Multi-Purpose Cooperative (TUFMPC) kaniadtong Nobyembre 28, 2025.
Gipasiugda sa kalihokan ang pagpalig-on sa rural enterprises ug paghatag ug dugang oportunidad sa agrarian reform beneficiaries aron makab-ot ang malungtarong pag-uswag. Gipasabot sa DAR Zamboanga del Norte, pinangulohan ni PARPO II Daisy Dell Suan Digamon, nga ang kalampusan mas lig-on kung ang komunidad hatagan dili lang ug mga kahimanan, kondili usab ug kusog ug kumpiyansa sa paglambo.
Mitambong usab ang opisyales sa DAR ug LGU, lakip si 3rd District Board Member Leo Nicanor Mejorada, Mayor Angeles Carloto II, ug uban pang lokal nga lider nga nagpakita sa ilang suporta ug pagtinabangay alang sa kalambuan sa sektor sa agrikultura.
Gidawat sa TUFMPC ang proyekto uban sa pasalamat, pinaagi ni Chairperson Julito Ladeza nga misaad sa responsable nga pagdumala ug pagpadayon sa gihatag nga tabang.
Ang MOA signing ug turnover dili lamang seremonya, kondili usa ka timaan sa padayong paglambo, pagtinabangay ug pagdasig nga ang mag-uuma sa Tampilisan padayon nga motubo, molambo ug mosaka pa ngadto sa mas lig-on ug malungtarong kaugmaon.(IKEN B. GULLEM)
Source: DAR Zambonorte