Namatay ang usa ka 34-anyos nga minyo nga lalaki human gipusil sa wala mailhing riding-in-tandem suspects sa Capitol Avenue, Purok Bayanihan, Barangay Estaka, Dipolog City niadtong gabii sa Hunyo 24.
Sumala sa inisyal nga imbestigasyon sa kapulisan, naglingkod ang biktima sa atubangan sa iyang negosyo sa dihang gipusil sa mga suspek. Dali siyang gidala sa Zanorte Medical Center apan gideklarang dead on arrival sa mitambal nga doktor.
Gilunsad dayon sa Dipolog City Police Station ang hot pursuit operation ug dragnet operation uban sa ubang police units aron masubay ang mga suspek nga mikalagiw human sa krimen.
Padayon karon ang imbestigasyon sa kapulisan pinaagi sa pagrepaso sa mga CCTV footage, pagpangita og dugang ebidensya ug pagpakigsulti sa mga posibleng saksi aron mailhan ang mga responsable ug matino ang motibo sa maong pagpamusil.(JENIFFER JR. DELICA)
Source: Dipolog PNP