Himas rehas karon homan masikop ang usa ka 21 anyos nga drug suspek atol sa gikasa nga buy-bust operation sa mga personahe sa kapulisan mga alas 9:16 sa gabii niadtong Hunyo 24, 2026,didto sa Purok Kalambuan, Barangay Sta. Filomena, Dipolog City, Zamboanga del Norte.
Ang maong dinakpan naila nga usa ka lalaki,21 anyos ,bag-ong nailhan nga drug personality kinsa nakumpiskahan sa kapulisan ug sobra sa 1 ka gramo sa ilegal na drugas nga nagkantidad sa gibana-gibana nga P6,800 ka pesos lakip ang mga butang nga dili drugas.
Ang pagkadakop sa nasangpit nga drug suspek gihimo pinaagi sa mga personahe sa Dipolog City Police Station (SDET), nga nagsilbing lead unit, uban sa Regional Drug Enforcement Unit 9 (RDEU-9), 901st Regional Mobile Force Battalion 9 (RMFB-9), ug sa koordinasyon sa Philippine Drug Enforcement Agency Region 9 (PDEA-9).
Ang nakumpiska nga gituohang ilegal nga droga ipadala ngadto sa Zamboanga del Norte Provincial Forensic Unit alang sa laboratory examination, samtang ang dinakpan nga suspek anaa pa sa kustodiya sa Dipolog City Police Station alang sa pagpasaka og tukmang kaso ug uban pang legal nga proseso.(MEDALYN U. BORJA)
Source: ZNPPO