Giandam na ang kasong Grave Threat ug administratibong reklamo batok sa usa ka Police Corporal nga nalambigit sa viral nga insidente diin giingong mihulga kini og sibilyan gamit ang armas sa Dapitan City.
Sumala sa NAPOLCOM Region 9, ang pulis nga nadestino sa Sapang Dalaga Municipal Police Station sa Misamis Occidental mitahan sa iyang kaugalingon ngadto sa kapulisan ug dayon gibalhin sa headquarters sa Misamis Occidental Police Provincial Office alang sa hustong disposisyon.
Gikompiska usab ang service firearm sa maong pulis, samtang ang kasong kriminal nga Grave Threat giendorso na ngadto sa City Prosecutor’s Office sa Dapitan alang sa pormal nga pagsang-at.
Padayon karon ang koordinasyon sa NAPOLCOM IX sa Dapitan City Police Station ug sa biktima aron mapadali ang pagsang-at sa administratibong mga kaso. Gipasidan-an usab sa komisyon ang tanang miyembro sa PNP nga magpabiling disiplinado ug propesyonal sa tanang higayon, ug gibutyag nga ang bisan unsang paglapas sa disiplina pagaatubangon og angay nga aksyon.(JENIFFER JR. DELICA)
Source: NAPOLCOM