Personal nga gideliber sa lokal nga panggamhanan ang tag-10 ka kilo nga bugas ngadto sa 276 ka panimalay sa Barangay Carang niadtong Agosto 3 pinaagi sa Local Government Support Fund (LGSF) Rice Distribution Program.
Ang house-to-house nga distribusyon gihimo aron masiguro nga hapsay ug sayon ang paghatod sa ayuda, ilabina sa mga benepisyaryo nga dili na kinahanglan mobiya sa ilang panimalay o trabaho aron makadawat sa bugas.
Ang maong programa kabahin sa panagtambayayong sa nasyonal ug lokal nga panggamhanan sa paghatag og food assistance ngadto sa mga kwalipikadong pamilya.
Gipangunahan ang distribusyon ni Programs and Services City In-Charge ug Community Affairs Officer Iolus Edgar Adasa, uban sa mga kawani sa City Social Welfare and Development Office (CSWDO) ug sa suporta sa ubang opisyal sa lokal nga panggamhanan.
Sumala sa LGU, ang maong pamaagi nagtumong sa mas episyente ug organisadong paghatod sa serbisyo ngadto sa mga benepisyaryo.(IKEN B. GULLEM)
Source: Dapitan City Government