Gibuhian pag-usab sa Department of Environment and Natural Resources–Community Environment and Natural Resources Office (DENR-CENRO) Manukan ang usa ka Loggerhead Sea Turtle ngadto sa iyang natural nga pinuy-anan sa Barangay Dohinob niadtong Agosto 2, human kini marehabilitar gikan sa samad nga naangkon.
Unang naluwas ang maong pawikan niadtong Hulyo 30 human makadawat og report ang CENRO Manukan gikan sa Municipal Environment and Natural Resources Office (MENRO) sa Sindangan bahin sa usa ka huyang nga pawikan nga nagsingabot sa baybayon sa Barangay Upper Inuman. Giluwas kini nila Mrs. Cirilo Orong ug Barangay Kagawad Reynaldo T. Silvano, nga dayong mipahibalo sa mga otoridad.
Sa pagsusi sa mga technical personnel sa CENRO Manukan, nasayran nga ang pawikan usa ka Loggerhead Sea Turtle (Caretta caretta) nga adunay gibug-aton nga 15 ka kilo ug may sukod nga 55 sentimetro ang curved carapace length ug 58 sentimetro ang curved carapace width. Nadiskubre usab nga adunay lawom nga samad sa ulo ang maong pawikan ug huyang na ang kahimtang niini.
Gidala ang pawikan sa Dohinob Pawikan Hatchery and Rescue Center diin gihatagan kini og tambal, pag-atiman, ug padayon nga pagmonitor sa tabang ni Dr. Sunday Dawn R. Bagatua sa Provincial Veterinary Office. Human hingpit nga makarekober, gitag-an kini og flipper tags PH1213A ug PH1214A sa wala ug tuo nga palikpik sa dili pa gibuhian balik sa dagat.
Gipasalamatan sa DENR-CENRO Manukan ang dali nga paglihok sa mga residente, MENRO Sindangan, ug uban pang partner agencies nga nakatampo sa malampusong pagluwas, rehabilitasyon, ug pagbuhi pag-usab sa maong pawikan. Gi-awhag usab sa ahensya ang publiko nga dayong ireport sa DENR o lokal nga mga otoridad ang mga napadpad o nasamdan nga marine wildlife aron mapalig-on ang pagpanalipod sa kinaiyahan.(IKEN B. GULLEM)
Source: DENR Zamboanga Peninsula