Malampusong nagpahigayon ang Local Government Unit sa Gutalac, ubos sa liderato ni Mayor Eddie Justin Quimbo, og symposium sa Parent Effectiveness Service ug Empowerment and Reaffirmation of Paternal Abilities niadtong nilabay nga adlaw. Gipasiugdahan kini sa Municipal Social Welfare and Development Office nga gipangulohan ni Margie Maratas aron palig-onon ang papel sa pamilya sa komunidad.
Gitambongan sa mga ginikanan, ilabi na sa mga amahan, ang maong kalihokan diin gihisgutan ang responsableng pagpadako sa anak, paghatag og emosyonal nga suporta, ug aktibong papel sa pagkaamahan sulod sa panimalay. Gipasiugda nga ang ginikanan dili lamang tig-provide kondili giya, panalipod, ug ehemplo sa ilang mga anak.
Sumala sa LGU, dako ang papel sa mga ginikanan sa paghulma sa kinaiya ug kaugmaon sa kabataan. Pinaagi sa maong symposium, gipalig-on ang kahibalo ug pagsalig sa kaugalingon sa mga amahan aron mas epektibo silang makatuman sa ilang responsibilidad.
Nagpadayon ang LGU Gutalac sa paghatag og mga programa nga magpalig-on sa pamilya ug maghatag og empowerment sa matag ginikanan, tungod kay kung lig-on ang panimalay, mas malinawon ug mauswagon ang komunidad.(JENIFFER JR. DELICA)
Source: LGU-Gutalac Public Information