Malampusong gipahigayon ang Goods Donation Program: Turn-Over Ceremony sa New Terminal, Purok Sta. Cruz, Baybay, Liloy, Zamboanga del Norte. Ang maong inisyatiba nahimong posible pinaagi sa suporta sa Zamboanga del Norte Association of Illinois (ZAMNAI) nga gipangulohan ni Joshua Amado Bicoy, Dipolog Youth Club of Dipolog and Chicago, Children International Philippines, Inc., ug Liloy Association of Illinois, sa pakigtambayayong sa Probinsya sa Zamboanga del Norte ug uban pang lokal nga mga kaabag.
Gibanabana nga nagkantidad og Php 20 hangtod 25 milyon ang mga donasyong medikal nga suplay, kagamitan, ug uban pang importanteng butang nga gihatag. Gilauman nga makapalig-on kini sa kapasidad sa lokal nga mga pasilidad panglawas ug mga institusyon sa serbisyo publiko, ilabi na sa pagpaayo sa paghatag og health services ug nutrisyon sa komunidad.
Sumala sa lokal nga panggamhanan, ang mga donasyon tabangan ang mga health workers nga mas epektibong makaserbisyo ug makahatag og kalidad nga pag-atiman sa mga pamilya, kabataan, ug mga residente sa hilit nga lugar. Gipasalig usab nga dumalahon ug gamiton ang tanang donasyon sa responsableng paagi, nga adunay hustong dokumentasyon ug transparency.
Nagpasalamat ang Municipality of Liloy sa tanang donors ug partners nga nagpakita og lig-on nga suporta sa pagpaangat sa kahimtang sa katawhan, samtang naglaum sa padayon nga panag-uban alang sa kaayohan sa tibuok lungsod ug probinsya.(JENIFFER JR. DELICA)
Source: Municipality of Liloy