Nadakpan sa kapulisan ang usa ka 35 anyos nga lalaking giila isip street-level individual atol sa pagpatuman sa search warrant sa Purok Rose, Magsaysay Street, Barangay Barra, Dipolog City, nga nagresulta usab sa pagkarekober sa gidudahang shabu.
Gipahigayon ang operasyon sa Dipolog City Police Station sa pakigtambayayong sa Philippine Drug Enforcement Agency Region IX. Nasakmit sa mga operatiba ang usa ka dako ug upat ka gagmay’ng heat-sealed plastic sachets nga adunay gidudahang shabu, usa ka plastik nga sudlanan, ug uban pang mga ebidensya. Ang gidak-on sa narekober nga gidudahang ilegal nga droga mikabat og gibana-banang tulo ka gramo nga adunay balor nga ₱20,400 base sa standard drug price sa PDEA.
Gidala ang mga nasakmit nga ebidensya ngadto sa Zamboanga del Norte Provincial Forensic Unit alang sa laboratory examination aron makumpirma ang sulod niini.
Samtang, nagpabilin sa kustodiya sa Dipolog City Police Station ang nadakpan nga suspetsado samtang giandam ang kasong isaka batok kaniya tungod sa giingong paglapas sa Republic Act 9165 o Comprehensive Dangerous Drugs Act of 2002.(JENIFFER JR. DELICA)
Source: Dipolog City Police Station (PR)