Gisugdan sa DepEd Schools Division of Dapitan City ang bag-ong pamaagi sa pagdumala sa transaksiyon sa mga suppliers pinaagi sa paglunsad sa Suppliers’ Operational System (SOS) atol sa gipahigayong Stakeholders’ Summit.
Gihimo ang kalihokan sa Dapitan City Government Employees Association MPC, diin gipaila ang SOS isip digital nga plataporma para mas paspas, klaro, ug organisado ang proseso sa procurement ug monitoring sa mga transaksiyon.
Gipasabot sa mga resource speakers ang bag-ong balaod ug patakaran nga angay masabtan sa mga suppliers, lakip ang New Government Procurement Act, Adopt-a-School Act, tax incentives, competitive bidding, ug hustong dokumentasyon.
Gipakita usab sa Division IT Officer ang aktuwal nga gamit sa SOS nga motabang sa real-time tracking ug mas lig-on nga koordinasyon tali sa DepEd ug mga partners.
Samtang, gipasalamatan sa DepEd ang tanang stakeholders sa ilang padayon nga suporta sa mga programa ug proyekto sa dibisyon. Sumala sa pamunuan, ang digital shift usa ka lakang padulong sa mas transparent ug episyenteng serbisyo para sa edukasyon sa Dapitan City.(IKEN B. GULLEM)
Source: DEPED TAYO- DIVISION OF DAPITAN CITY