Isip kabahin sa pagpalig-on sa civil-military cooperation, gidawat ni LtCol Jessie G. Bergonia, Commanding Officer sa 97th Infantry Batallion, ang mga lider sa Ozamiz Confession ug Regional Peoples’ Organization atol sa usa ka courtesy call niadtong milabay nga adlaw sa 97IB Headquarters sa Piñan, Zamboanga del Norte.
Ang courtesy call nahimong higayon sa paghisgot sa padayon ug umaabot nga mga inisyatiba nga nagpalig-on sa panaghiusa sa militar ug sibilyang sektor sa pagtukod og malinawon ug lig-ong komunidad.
Girepaso sa mga partido ang mga programa nga nagpunting sa kahimsog, panginabuhian, ug kalamboan sa komunidad, ilabi na sa mga lugar nga kaniadto naapektuhan sa armadong panagbangi.
Gipahayag sa RPO ang ilang suporta sa pagpalig-on sa mga lokal nga organisasyon pinaagi sa livelihood ug socio-economic projects, samtang ang Ozamiz Confession nagpadayon sa paghatag og medical ug humanitarian assistance sa mga komunidad.
Samtang, gipasalig sa 97IB ang ilang padayon nga pakigtambayayong sa mga kauban nga organisasyon isip kabahin sa ilang mandato sa pagpanalipod sa katawhan ug pagpalambo sa kalinaw ug kaayohan sa Zamboanga del Norte.(IKEN B. GULLEM)
Source: 97th Infantry “Kalasaglahi” Batallion