Pinaagi sa City Social Welfare and Development Office (CSWD), nag-apod-apod ang Dapitan City Government og mga Ready-to-Eat Food Packs ngadto sa mga locally stranded individuals (LSIs) sa Dapitan City Pulauan Port niadtong Hulyo 8, human masuspenso ang biyahe sa dagat tungod sa Super Typhoon Inday.
Gitumong ang maong tabang aron mahatagan og pagkaon ang mga pasahero nga napundo sa pantalan samtang naghulat sa pagbalik sa normal nga operasyon sa mga sakayan.
Nahimo ang relief operation pinaagi sa koordinasyon sa Department of Social Welfare and Development (DSWD), Philippine Ports Authority (PPA), ug Philippine Coast Guard (PCG). Gilayon usab nga gipagawas ang mga pre-positioned relief goods isip kabahin sa disaster preparedness sa siyudad.
Nagpadayon ang Dapitan City Government sa paghatag og angay nga tabang ug pagpakusog sa koordinasyon sa mga partner agencies aron masiguro ang kaluwasan ug kaayohan sa mga residente ug mga biyahero samtang nagpadayon ang pagmonitor sa kahimtang sa panahon.(IKEN B. GULLEM)
Source: Dapitan City Government