Gipauswag ang kahibalo ug kahanas sa mga agricultural technicians sa Zamboanga del Norte pinaagi sa upat ka adlaw nga EGBU Scale-Up Mid-Year Assessment ug Training nga gipahigayon sa Office of the Provincial Agriculturist (OPAG) sa Roxas niadtong Hulyo 8.
Gipangulohan ni Acting Provincial Agriculturist Armie Bergado ang maong kalihokan nga nagtumong sa pagsusi sa kasamtangang implementasyon sa mga programa sa OPAG, pag-ila sa mga aspeto nga angay pang mapalambo, ug paghatag og dugang kahibalo sa mga agricultural technicians aron mas mapalambo ang ilang serbisyo ngadto sa mga mag-uuma sa probinsya.
Lakip sa mga hilisgutan nga gihisgutan ang seed-to-seedling management, transplanting, fertilization, insect pest identification and management, plant disease identification and management, harvesting, post-harvest handling, agricultural marketing, ug uban pang modernong pamaagi nga makatabang sa pagdugang sa produksiyon ug kalidad sa mga ani.
Matod ni Gobernador Darel Dexter Uy, ang padayon nga pagpalig-on sa sektor sa agrikultura usa sa mga prayoridad sa Provincial Government aron masiguro ang food security ug mapauswag ang nutrisyon sa katawhan. Dugang pa niya nga magpadayon ang suporta sa kagamhanan ngadto sa mga mag-uuma ug mangingisda pinaagi sa paghatag og libreng abono ug uban pang agricultural inputs.
Gibutyag usab sa gobernador ang plano sa pagtukod og international seaport sulod sa Provincial Agri-Industrial Center (PAIC), nga gilauman makatampo sa pagpaubos sa presyo sa abono ug uban pang farm inputs. Human sa kalihokan, gibisita niya ang mga pasilidad sa PAIC aron susihon ang kahimtang niini ug ang mga kinahanglanon alang sa hapsay nga operasyon sa umaabot.(IKEN B. GULLEM)
Source: Zamboanga del Norte Provincial News Network