Nakadawat og ₱520,000 nga livelihood assistance package ang SPLA Guimputlan Association sa Barangay Guimputlan, Dapitan City gikan sa Department of Social Welfare and Development (DSWD) pinaagi sa Sustainable Livelihood Program (SLP) niadtong Hulyo 8.
Naglangkob ang maong assistance package sa Piso WiFi business, rice trading, ug corn trading nga gilauman makahatag og lig-on ug padayon nga panginabuhian sa mga miyembro sa asosasyon.
Gipangulohan ni DSWD Provincial Coordinator Therese Maravel B. Arcena ang turnover ceremony uban sa City Social Welfare and Development Office (CSWDO). Mitambong usab si City Councilor Dennis Tan isip representante ni Mayor Evelyn “Belen” T. Uy, nga mipadayag sa padayon nga suporta sa City Government sa mga programang naghatag og dugang oportunidad sa panginabuhian sa mga komunidad.
Nagpasalamat usab ang mga opisyal sa Barangay Guimputlan ug ang SPLA Guimputlan Association sa maong ayuda, nga ilang gilauman mahimong lig-on nga tinubdan sa kita sa ilang mga miyembro.
Samtang, gidasig ni Mayor Uy ang mga benepisyaryo nga hapsayon ug dumalahon pag-ayo ang proyekto aron masiguro ang kalig-on ug padayon nga kalampusan niini.(IKEN B. GULLEM)
Source: Dapitan City Government