Gihatagan og ₱300,000 nga Project Development and Advancement Grant (PDAG) sa Department of Social Welfare and Development (DSWD) ang malampusong pagdumala sa livelihood project sa Palamboon Sta. Fe Sustainable Livelihood Program Association (SLPA) sa Barangay Sta. Fe, Piñan, Zamboanga del Norte.
Ang grant gihatag isip pag-ila sa maayong pagdumala sa asosasyon sa ilang coco coir livelihood project, nga gitukod pinaagi sa ₱450,000 nga Seed Capital Fund ubos sa Sustainable Livelihood Program (SLP) niadtong 2024.
Sulod sa duha ka tuig, napadayon sa asosasyon ang pagproseso sa bunot sa lubi ngadto sa paghimo og pisi, nga nakatabang sa pagpalig-on sa panginabuhian sa mga miyembro ug nahimong basehan sa pagdawat sa dugang nga suporta gikan sa DSWD.
Opisyal nga gidawat sa grupo ang grant niadtong Hulyo 30 atol sa ceremonial turnover nga gitambongan sa mga opisyal sa DSWD Dipolog Cluster, Provincial Government sa Zamboanga del Norte, ug Barangay Sta. Fe. Gidungan usab niini ang pagbendisyon sa poultry house sa asosasyon nga adunay 193 ka layer chickens.
Matod ni Provincial Social Welfare and Development Officer Hannah Lou Gumapon-Mandantes, padayon nga gipalapad sa Provincial Government ubos sa liderato ni Gobernador Darel Dexter Uy ang suporta sa mga livelihood associations pinaagi sa pagpalig-on sa marketing, paghatag og mga pagbansay, ug pagpakigtambayayong sa ubang ahensya aron masiguro ang malungtarong pag-uswag sa ilang mga negosyo.
Gilauman sa DSWD nga magpadayon ang Sta. Fe SLPA sa maayong pagdumala sa ilang mga proyekto aron makaabot sa graduation phase sa programa ug mahimong lig-on ug self-sufficient nga asosasyon.(IKEN B. GULLEM)
Source: Zamboanga del Norte Provincial News Network