Natural nga depensa batok sa kusog nga balud, storm surge, ug coastal erosion ang padayong gipalig-on sa Zamboanga del Norte pinaagi sa mangrove planting ug coastal clean-up activity sa Barangay San Antonio, Katipunan niadtong Hulyo 30.
Kabahin sa kalihukan ang pagtanom og 1,000 ka bakhaw ug 500 ka talisay seedlings sa kabaybayonan sa barangay, nga gitumong sa pagpalig-on sa pagpanalipod sa mga baybaying komunidad ug pagpausbaw sa kahandaan batok sa mga kalamidad.
Kapin sa 200 ka partisipante ang miapil sa maong kalihukan nga gipangunahan sa Provincial Government of Zamboanga del Norte pinaagi sa Office of the Provincial Environment and Natural Resources Officer (OPENRO), sa pakigtambayayong sa Office of the Provincial Disaster Risk Reduction and Management Officer (OPDRRMO), Office of the Provincial Social Welfare and Development Officer (OPSWDO), Philippine National Red Cross (PNRC), Pag-asa Youth Association of the Philippines (PYAP), mga sakop sa militar, ug mga opisyal ug residente sa Barangay San Antonio.
Matod ni OPDRRMO Research and Planning Division Head Designate Mary Jane Tigon, ang mga bakhaw nagsilbing natural nga panalipod batok sa kusog nga balud ug storm surge, samtang makatabang usab kini sa pagpugong sa coastal erosion. Ang mga kahoyng talisay usab, matod niya, adunay papel sa pagpaubos sa temperatura sa palibot ug pagsuyop sa carbon dioxide, nga makatabang sa pagkunhod sa epekto sa climate change.
Smatang, nagpasalamat si Barangay Captain Alma Jaictin sa Provincial Government ug sa mga kaabag nga ahensya tungod sa programa, nga matod niya makatabang sa pagpanalipod sa ilang barangay batok sa mga hulga sa kalamidad ug sa pagpreserbar sa kinaiyahan.(IKEN B. GULLEM)
Source: Zamboanga del Norte Provincial News Network