Dili lamang mga nahuman nga proyekto ang gipasiugda sa State of the Municipality Address (SOMA) 2026 sa Mutia, kondili usab ang mga dagkong inisyatiba nga gipaabot nga mohulma sa sunod nga yugto sa pag-uswag sa lungsod.
Sa SOMA niadtong Hulyo 20, gipadayag ni Mayor Lorrymir S. Adasa ang mga proyekto nga anaa na sa pipeline, lakip ang ₱200-milyon nga water system development pinaagi sa Philippine Rural Development Project (PRDP), Municipal Plaza improvement, Municipal Hall renovation, Bus Terminal ug Sports Complex.
Apil usab sa mga gipaabot nga proyekto ang dugang nga mga inisyatiba sa tubig, panglawas ug imprastraktura nga gitumong sa pagpalig-on sa batakang serbisyo alang sa mga Mutiaanon.
Samtang nag-andam sa mga bag-ong proyekto, gilatid usab sa administrasyon ang mga nahimo na niini sa nagkadaiyang sektor. Lakip niini ang pagpalambo sa mga kalsada ug Municipal Gymnasium, mga proyekto sa suplay sa tubig, ug ang pagpalapad sa access ngadto sa mga waterfalls sa lungsod pinaagi sa access roads ug foot trails.
Sa edukasyon, nagpadayon ang pag-deploy sa LGU-paid teaching personnel sa 16 ka barangay, samtang nagpadayon ang negosasyon alang sa pagtukod sa siyam ka dugang classroom.
Gipasiugda usab ang mga nahimo sa panglawas ug nutrisyon, lakip ang kapin 101 porsiyentong accomplishment rate sa Measles-Rubella Supplemental Immunization Activity ug ang pag-ila sa Mutia isip usa sa mga sentro sa pagbisita sa World Bank ug partner agencies tungod sa implementasyon sa Philippine Multisectoral Nutrition Project.
Sa agrikultura, kapin 1,900 ka rice farmers ang nakadawat og ayuda ubos sa Presidential Assistance for Farmers and Fisherfolk Program, samtang gipadayon ang paghatag og binhi, abono ug livelihood support sa mga mag-uuma.
Sa turismo, nadugangan usab ang suporta sa lungsod pinaagi sa ₱20-milyon nga Tourism Hub Project sa TIEZA.
Matud ni Mayor Adasa, ang mga kalampusan ug umaabot nga mga proyekto sa Mutia bunga sa panaghiusa sa lokal nga panggamhanan, mga partner nga ahensya ug sa katawhan, nga iyang gidasig nga magpadayon sa pagtinabangay aron matuman ang panan-awon alang sa mas lig-on ug mas malambuong Mutia.(IKEN B. GULLEM)
Source: Zamboanga del Norte Provincial News Network