Gisaulog sa Local Government Unit sa Polanco ang Solo Parents Day pinaagi sa pagpasidungog sa kalig-on ug sakripisyo sa mga solo parent, lakip ang paghatag og financial assistance isip suporta sa ilang adlaw-adlaw nga panginahanglan.
Sa mensahe ni Mayor Ying Uy, iyang gidayeg ang walay kapoy nga paningkamot sa mga solo parent sa pagpadako sa ilang mga anak ug gipasalig nga padayon silang suportahan sa lokal nga panggamhanan pinaagi sa nagkalain-laing programa ug serbisyo.
Gipasiugda usab sa alkalde nga dili nag-inusara ang mga solo parent, hinunoa adunay LGU Polanco nga andam kanunay maminaw, motabang, ug motubag sa ilang mga panginahanglan isip kabahin sa responsibilidad sa gobyerno sa pag-atiman sa mga pamilya.
Sumala sa LGU, ang maong selebrasyon nagpakita sa padayong paningkamot sa lokal nga panggamhanan sa pagpalig-on sa kaayohan sa mga solo parent ug sa pagtukod og mas lig-on nga kaugmaon alang sa ilang mga anak.(JENIFFER JR. DELICA)
Source: Mayor Ying Uy