Laing dako nga kalamboan ang natagamtaman sa mga residente sa Barangay Pongolan, Roxas human opisyal nga nadawat ang usa ka Solar Water System nga gilangkoban og ₱5 milyon nga proyekto, nga naghatag og dugay nang gipangandoy nga access sa limpyo ug kasaligan nga tubig.
Ang maong pasilidad gi-turnover ubos sa pagpanguna ni Congresswoman Irene “Ate Ai” Labadlabad, isip kabahin sa padayon nga paningkamot sa paghatag og basic services nga direkta makabenepisyo sa katawhan, ilabi na sa mga komunidad nga dugay nang naglisod sa tubig.
Ang solar-powered water system dili lang usa ka imprastraktura, kundili usa ka sustainable nga solusyon nga makatabang sa pagpakunhod sa gasto sa tubig ug sa paggamit sa renewable energy nga makabenepisyo sa umaabot nga henerasyon.
Mitambong sa maong kalihokan si Mayor Ismael Rengquijo Jr., Vice Mayor Jun Yebes, Barangay Captain Ismael Quintero, ug uban pang barangay opisyal nga mipadayag sa ilang suporta ug pagpasalamat sa proyekto.
Sa iyang mensahe, gipasiugda ni Cong. Labadlabad nga ang kalampusan sa proyekto resulta sa panaghiusa sa mga lider ug komunidad nga nagtambayayong aron maabot ang tinuod nga serbisyo publiko.
Pinaagi niini nga proyekto, gilauman nga mas mapalambo pa ang kalidad sa kinabuhi sa mga residente sa Pongolan pinaagi sa sigurado, limpyo, ug mas sustainable nga suplay sa tubig.(IKEN B. GULLEM)
Source: Kuya Nats in action Tv spin media Zamboanga Norte