Laing 415 ka pamilya sa Barangay San Pedro, Dapitan ang nakabenepisyo sa “Rice for All Program,” nga nagtanyag og bugas sa subsidized nga presyo nga ₱20 matag kilo aron makatabang sa pagsaka sa presyo sa mga batakang palaliton.
Gipahigayon ang distribusyon sa organisado ug hapsay nga paagi pinaagi sa panagtinabangay sa City Agriculture Office, City Treasurer’s Office, ug sa 1st District Congressional Office, nga nagtinabangay aron masiguro ang dali ug episyenteng paghatag sa serbisyo sa komunidad.
Sa maong kalihokan, gipahigayon usab sa City Health Office (CHO) ang YAKAP registration aron mapalapdan ang access sa mga residente sa nagkalain-laing serbisyong panglawas.
Matud sa lokal nga gobyerno, kabahin kini sa ilang padayon nga paningkamot sa pagpalig-on sa food security ug pagpaubos sa gasto sa pagkaon alang sa katawhan.
Gilauman nga mapadayon ug mapalapad pa ang “Rice for All Program” aron mas daghan pang mga pamilya sa Dapitan ang makabenepisyo, ilabi na sa panahon sa pagsaka sa presyo sa mga batakang palaliton.(IKEN B. GULLEM)
Source: City Government of Dapitan