Nakaangkon ang mga hilit nga lugar sa Zamboanga del Norte og dugang suporta sa edukasyon human gihatagan og musical instruments ug school supplies ang siyam ka Last Mile Elementary Schools ubos sa Healthy Learning Institution (HLI) Program, kaniadtong Abril 13, 2026.
Lakip sa mga nakabenepisyo ang mga eskwelahan sa Katipunan ug Siayan, diin gilauman nga mapalambo ang kahimtang sa pagkat-on ug madugangan ang partisipasyon sa mga estudyante sa musika ug uban pang creative nga kalihokan.
Kini nga inisyatibo kabahin sa panagtinabangay sa Department of Health ug Department of Education aron mapalig-on ang himsog, luwas ug maayong learning environment sa mga eskwelahan nga nahimutang sa layo ug lisod maabot nga komunidad.
Gipahigayon ang turnover sa ZN Convention and Sports Center uban sa presensya sa mga opisyal sa probinsya ug health sector, nga nagpasabot sa padayon nga paningkamot sa paghatag og patas nga kahigayonan sa edukasyon alang sa tanang kabataan sa probinsya.(IKEN B. GULLEM)
Source: Zamboanga del Norte Provincial News Network