Sa unang adlaw sa ikaduhang hugna sa gipahigayong Assistance to Individuals in Crisis Situation (AICS) payout, mokabat sa 1,100 ka benepisyaryo gikan sa napulo ka barangay sa Dapitan City ang nakadawat og pinansyal nga tabang gikan sa Department of Social Welfare and Development (DSWD).
Gipahigayon ang distribusyon didto sa Dapitan City Central School isip kabahin sa upat ka adlaw nga payout, diin ang matag barangay giiskedyul aron masiguro ang hapsay ug organisado nga pag-apod-apod sa ayuda ug malikayan ang dagsang panagtapok sa mga tawo.
Sa kinatibuk-an, target sa maong programa nga matabangan ang 4,512 ka mga benepisyaryo sa tibuok siyudad. Ang payout kabahin sa padayon nga paningkamot sa gobyerno sa paghatag og agarang tabang sa mga pamilyang nag-atubang og kalisod, lakip na ang panginahanglan sa pagkaon, medisina ug edukasyon.
Gilauman usab ang ikatulong hugna sa AICS payout sa dili pa matapos ang 2026, samtang ang mga lokal nga opisyal nag-aghat sa mga benepisyaryo nga gamiton sa hustong paagi ang ilang nadawat nga ayuda ug magpadayon sa panaghiusa aron mapalambo ang kahimtang sa komunidad.(IKEN B. GULLEM)
Source: Zamboanga del Norte Provincial News Network