Nakoronahan isip Miss Eco Tourism 2026 si Roveelaine Eve Castillo sa Siocon atol sa grand coronation night sa Miss Philippines Earth 2026 nga gipahigayon niadtong Hunyo 27 sa Cultural Center sa Malitbog, Bukidnon.
Napili si Castillo isip usa sa mga miyembro sa Elemental Court human mapilde ang 31 ka uban pang kandidata gikan sa nagkalain-laing bahin sa nasod pinaagi sa iyang kaanyag, kaalam, ug lig-on nga adbokasiya alang sa pagpanalipod sa kinaiyahan.
Pinaagi sa iyang kadaugan, mas gipaila ni Castillo ang Siocon ug ang tibuok lalawigan sa Zamboanga del Norte isip pinuy-anan sa mga kababayen-ang adunay katuyoan sa pagpalambo sa malungtarong turismo ug pag-atiman sa kinaiyahan.
Samtang, si Rina Andrea Delos Santos sa Ballesteros, Cagayan ang gikoronahang Miss Philippines Earth 2026, ug maoy morepresentar sa Pilipinas sa internasyonal nga Miss Earth pageant karong tuiga.
Isip Miss Eco Tourism 2026, gilauman nga manguna si Castillo sa pagpasiugda sa responsable ug eco-friendly nga turismo nga nagpanalipod sa kinaiyahan samtang naghatag og kaayohan sa mga lokal nga komunidad.(IKEN B. GULLEM)
Source: Zamboanga del Norte Provincial News Network