Laing hugpong na usab sa mga Alternative Learning System (ALS) learners ang malampusong nakagradwar ug nakakompleto sa moving-up ceremonies nga gipahigayon sa Department of Education (DepEd) Schools Division Office sa Dapitan City niadtong Hunyo 27 sa Dapitan City Central School Covered Court.
Ang seremonya nagtimaan sa usa ka mahinungdanong kalampusan alang sa mga learners nga mipili sa alternatibong pamaagi sa pag-eskwela aron mapadayon ug mahuman ang ilang edukasyon.
Gipasiugdahan ang kalihokan pinaagi sa mensahe ni Daisy C. Baje, LPT, nga nagdasig sa mga graduwado nga ipadayon ang ilang mga damgo ug gamiton ang ilang nahuptang kahibalo ug maayong pamatasan sa pag-atubang sa sunod nilang mga lakang sa kinabuhi.
Pinaagi sa temang “Filipino Graduates: Prepared to Lead with Competence and Character,” nagpadayon ang DepEd sa paghatag og ikaduhang higayon sa mga kabatan-onan ug hamtong nga makab-ot ang ilang edukasyonal nga mga pangandoy.(IKEN B. GULLEM)